我殺咗老婆之後（下）
上集：https://bit.ly/3auYVwe
我鬆一口氣，睇嚟老婆係真心幫我嘅，如果唔係佢提點，我可能啱啱就露出馬腳啦。
所以，夜晚，老婆嘅鬼魂再嚟搵我嗰陣，我都放低咗少少戒心，聽佢嘅意見。
老婆認為，我應該去郊野地方，掘個深坑，埋咗佢條屍。
我好驚訝：「就咁簡單？」
「依加驗DNA嘅技術咁先進，碎屍又辛苦又冇乜用；用化學物品處理屍體，你又拎唔到專業嘅化學物品；丟落水，都唔知幾時浮番上嚟……」老婆分析晒，各種處理屍體方法嘅利弊。
我信佢，深夜，老婆揀咗個冇人煙嘅郊外，叫我將佢條屍埋落去。
過程中，老婆嘅鬼魂一直陪住我，幫我睇水。
嗰一刻，我真係好感動，仲好後悔殺咗佢。
男人一生，可以搵到一個俾你殺咗，仲會幫你埋佢條屍嘅老婆，係幾咁幸運？
幸運地，隔咗一排，警察都冇查到我，睇嚟老婆揀嘅地點真係好隱蔽。
不過，唔夠半年，老婆好心急咁嚟搵我，話我埋屍嗰個地方可能要發展，叫我轉移屍體。
我馬上帶住工具，將佢嘅屍骨掘出嚟，轉去新嘅地方。
轉移一條屍，真係好麻煩。
過程又攰又臭又噁心，途中仲要驚死俾人睇到，心理壓力好大。
過咗一段時間，老婆通知我，新嘅埋屍地點又出咗問題。
「又嚟？唔好啦，冇事嘅。」我頭都痛埋。
老婆繪聲繪影咁講，屍體被人發現嘅危險有幾大，佢有幾唔想我坐監，我唯有再次去轉移屍體。
自此之後，老婆成日都同我講，萬一屍體被發現，坐監有幾辛苦，我身邊嘅人會點睇我……
我知道佢係真心為我好，我都俾佢口中描述嘅噩夢，嚇到有啲驚。
所以，之後佢叫我轉移屍體，我雖然唔情願，但都乖乖去做。
不過，我成日處於膽戰心驚嘅狀況，晚晚發惡夢，健康愈嚟愈差。
後來，未夠四十歲，我就死咗。
直到死嗰一刻，老婆都一直陪住我，而且我殺人嘅事都冇被發現過，所以我都好感激老婆。
我落到地府，終於可以攬住老婆：「咁多年嚟，我真係好多謝你，一直都冇怪過我……」
老婆一手推開我：「我終於等到呢一日啦。」
老婆眼裡充滿憤怒同仇恨，我從來冇見過佢咁樣望住我，至少佢死後冇。
我好唔習慣，正想問點解，老婆就推一推我：「快啲行啦，要審判啦。」
我被帶到閻王面前，閻王好凶狠咁叫我跪低，話我生前殺妻，冇受到懲罰，善惡有報，按律應入油鍋地獄五十年。
落油鍋？我最怕痛，我連忙望向老婆，想佢幫我求情，既然當事人都原諒咗我……
老婆冷笑一聲：「我當年一落到地府，向閻王伸冤，就知道咗地府嘅規矩。如果犯罪嘅人，喺陽間得到應有嘅懲罰，落到地府就唔駛再罰。」
我倒抽一口涼氣：「所以你故意幫我處理屍體，希望我唔好俾警察捉到，落到地府先受罰？」
「梗係啦，你個人又蠢又驚青，冇我幫你，你早就坐咗監。」
老婆撇撇嘴：「喺陽間坐監，又輕鬆又文明。地府嘅刑罰重好多，我知你怕痛，梗係寧願你落油鍋。」
「大人，您聽到啦，係佢陰我㗎！處理屍體佢都有份！」我連忙對住閻王大叫。
閻王答：「非法處理屍體，喺地府都會受罰，但處理自己嘅屍體，就不在此限。」
老婆揚揚得意：「係啊，我係咁叫你轉移屍體，都係想折磨吓你。點知你咁唔捱得，咁快就死咗。」
我俾牛頭馬面拖落去，接受落油鍋嘅懲罰。
我同老婆關係咁差，我仲親手殺咗佢，點解我仲會以為，佢會嚟幫我？
或者，人對自己總係寬容好多，好容易以為，人哋應該對自己好、應該會原諒自己。
轉個角度睇，你緊張自己，人哋都緊張佢自己，邊有咁容易忘記，你對人哋造成嘅傷害呢？
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我殺咗老婆之後
Search